Bir tarkibli gaplar

Noaniq shaxsli gapda kesim fe’lning hozirgi yoki kelasi zamon ko‘plik 3-shaxs shaklida yoki o‘tgan zamon ko‘plik shaklida turadi, ammo harakatni kim bajarayotgani noma’lum yoki muhim emas: «В школе строят новый спортзал». «Говорят, завтра будет дождь». Bunday gapda e’tibor harakatga qaratiladi. Aniq shaxsli va noaniq shaxsli gaplar umumlashgan ma’noda ham keladi — ular maqol va matallarda ko‘p uchraydi: «Куй железо, пока горячо» (buyruq, 2-shaxs), «Лес рубят — щепки летят» (3-shaxs ko‘plik). Shaxssiz gapda ega yo‘q va bo‘lishi mumkin emas: harakat yoki holat kimningdir xohishiga bog‘liq bo‘lmay yuz beradi. Kesim 3-shaxs birlikdagi (yoki o‘tgan zamonda o‘rta jinsdagi) shaxssiz fe’l bilan («светает, знобит, не спится»), shaxsli fe’lning shaxssiz qo‘llanishi bilan («дует из окна», «лодку унесло течением»), «нужно, можно, нельзя, тепло, весело» kabi so‘zlar yoki «нет, не было» bilan ifodalanadi. Shaxssiz gapda holat egasi odatda jo‘nalish yoki tushum kelishigida turadi: «Мне холодно», «Меня укачало».