Ko‘pyoqlar va aylanish jismlari

Tekis ko‘pburchaklar bilan chegaralangan jism ko‘pyoq deyiladi; ko‘pburchaklar uning yoqlari, ularning tomonlari qirralari, uchlari esa ko‘pyoqning uchlari. Bir yoqqa tegishli bo‘lmagan ikki uchni tutashtiruvchi kesma ko‘pyoqning diagonali. Hamma yoqlari har bir yoq tekisligining bir tomonida yotsa, ko‘pyoq qavariq bo‘ladi (masalan, kub). Prizmaning ikki yog‘i (asoslari) teng ko‘pburchaklar, qolgan yon yoqlari parallelogrammlar; yon yoqlari asosga perpendikular bo‘lsa prizma to‘g‘ri, aks holda og‘ma, asosi muntazam ko‘pburchak bo‘lgan to‘g‘ri prizma muntazam; asosi parallelogramm bo‘lgan prizma parallelepiped, asosi to‘g‘ri to‘rtburchak bo‘lgan to‘g‘ri parallelepiped esa to‘g‘ri burchakli parallelepiped, o‘lchamlari teng bo‘lsa kub. Piramidaning bitta yog‘i (asos) ko‘pburchak, qolgan yon yoqlari bitta umumiy uchga ega uchburchaklar; asosi muntazam ko‘pburchak va balandligi asos markazidan o‘tsa, piramida muntazam, uning yon yog‘ining uchidan tushirilgan balandligi apofema. Muntazam piramidaning yon qirralari, yon yoqlari va apofemalari o‘zaro teng, yon sirti S = p · a (p — asosning yarim perimetri, a — apofema).