So‘roq, undov, ikki nuqta va nuqtali vergul

Savol bildirgan har qanday gap so‘roq belgisi bilan tugaydi. Muallif biror ma’lumotga shubha qilsa yoki uni aniq bilmasa, shu so‘zdan keyin qavs ichida so‘roq belgisini qo‘yib, o‘quvchini ogohlantirishi mumkin: «U 1998-yilda (?) tug‘ilgan». Undov belgisi esa gapda kuchli tuyg‘u – quvonch, hayrat, g‘azab – bo‘lganda, shuningdek, buyruq, iltimos yoki tilak bildirilganda qo‘yiladi. Gap boshida kelib, kuchli his-hayajon bilan aytilgan undalmalar hamda ha, yo‘q, xo‘p, uzr, mayli, xayr, salom kabi so‘z-gaplardan keyin ham undov qo‘yiladi. Fikr o‘ta kuchli his bilan aytilsa, ketma-ket uchtagacha undov belgisi qo‘yilishi mumkin. So‘roq va undov belgilari ba’zan birga ham keladi (?!).