Amirlikda markaziy hokimiyat va davlat boshqaruvi

Amirlik mutlaq monarxiya bo‘lib, amir cheklanmagan huquqqa ega edi va qaror qabul qilishda yuqori amaldorlar hamda qabila boshliqlari bilan maslahatlashgan. Ashtarxoniylar davridagi dargoh va devonlar tizimi tugatildi, davlat ishlari saroydagi lavozimlar yoki nufuzli shaxslar qo‘lida to‘plandi; qo‘shbegi amirdan keyingi ikkinchi shaxsga aylandi va Arkda yashadi, otaliq esa o‘z mavqeyini yo‘qotdi. Amirlik viloyatlarga (bekliklarga) bo‘lingan, adabiyotlarda 27 ta beklik tilga olinadi; ularni beklar boshqargan. Quyi pog‘ona ma’muriy birliklari sug‘oriladigan yer hajmiga qarab belgilangan, eng quyisi amlok bo‘lib, uni amlokdor, qishloq oqsoqollari, amin va miroblar yordamida boshqargan. Qo‘shbegidan keyin moliya vaziri (devonbegi) turgan; boshqa lavozimlarga parvonachi, inoqlar, to‘qsoba, ko‘kaldosh, mehtar, qutvol, miroxur va dodxoh kiritilgan. Shariat ijrosini shayxulislom, qozikalon, mufti, muhtasib (rais) va sadrlar ta’minlagan: qozikalon sudlarga rahbarlik qilgan, mufti fatvo bergan, sadrlar vaqf mulkini boshqargan.