Farg‘ona viloyati
Farg‘ona viloyati vodiyning tekislik qismi va Oloy hamda Turkiston tizmalarining tog‘oldilarini o‘z ichiga oladi. Isfayram, Shohimardon, So‘x va Isfara daryolari, shuningdek Norin va Qoradaryodan chiqarilgan kanallar dehqonchilik uchun muhim. Viloyat sanoat mahsuloti hajmi bo‘yicha mamlakatda yetakchi viloyatlar qatorida. Qishloq xo‘jaligi paxta, g‘alla va pillachilikka ixtisoslashgan: bahori yerlarda bug‘doy va arpa, zax yerlarda sholi o‘stiriladi, anor va anjir bilan ham mashhur; yaylovlar ko‘p bo‘lgani uchun qo‘y va echki boqiladi. Sanoat ko‘p tarmoqli, og‘ir sanoat ulushi katta: Farg‘ona va Oltiariqda ikkita neftni qayta ishlash zavodi, kimyo, energetika, mashinasozlik, qurilish materiallari, yengil va oziq-ovqat sanoati bor. Korxonalar Farg‘ona—Marg‘ilon sanoat rayoni hamda Qo‘qon va Quvasoy sanoat tugunlarida to‘planadi. Viloyat temiryo‘l va avtomobil yo‘llari bilan yaxshi ta’minlangan; undan paxta tolasi, shoyi, mato, quritilgan meva, o‘g‘it va sement chiqariladi, yog‘och, g‘alla, uskunalar va keng iste’mol mollari keltiriladi. Farg‘ona sanoat, transport va madaniyat markazi; Marg‘ilon qadimdan atlas va shoyi to‘qish bilan mashhur; Qo‘qon XVIII–XIX asrlarda Qo‘qon xonligining poytaxti edi; Quvasoyda sement va chinni, Rishtonda sopol buyumlar ishlab chiqariladi.
Marg‘ilon atlasi yoki Rishton sopolidan yasalgan buyumni uyingizda yoki muzeyda ko‘rib, naqshi va rangini tasvirlab bering. Sopol idishlarni sindirmaslikka ehtiyot bo‘ling.