Mirzacho‘l iqtisodiy rayoni va Sirdaryo viloyati

Mirzacho‘l iqtisodiy rayoni Sirdaryo va Jizzax viloyatlaridan tashkil topgan. U rivojlangan Toshkent va Zarafshon rayonlari bilan chegaradosh, temiryo‘l, avtomobil yo‘llari va gaz quvurlari shu yerdan o‘tadi, shuning uchun iqtisodiy-geografik o‘rni qulay. Hududni asosan Sirdaryo, Sangzor daryolari va Janubiy Mirzacho‘l kanali suv bilan ta’minlaydi; tekislik sug‘orish inshootlari va yo‘llar bilan zich qoplangan. Qazilma boyliklardan volfram, qo‘rg‘oshin, rux va oltin sanoat ahamiyatiga ega, qurilish uchun shag‘al, qum, gips va ohak ko‘p. Tabiiy noqulayliklar ham bor: shimoldan sovuq havo kirib, mevali daraxtlarga zarar yetkazadi, Farg‘ona vodiysi tomondan esadigan kuchli shamol esa tuproq namini quritadi. Aholi asosan XX asrning o‘rtalarida boshqa joylardan ko‘chib kelganlar avlodidan iborat, aholi punktlari katta yo‘llar bo‘ylab joylashgan; soni bo‘yicha rayon eng kichiklardan biri. Mirzacho‘l o‘zlashtirilishi sug‘orish inshootlari, yo‘llar, elektr tarmoqlari va ijtimoiy muassasalarni bir vaqtda qurish usulida olib borilgan. Rayon paxta, g‘alla, poliz ekinlari (mashhur Mirzacho‘l qovunlari), qorako‘l qo‘ychiligi va parrandachilikka ixtisoslashgan; elektr energetika, qurilish materiallari, yengil va oziq-ovqat sanoati ham rivojlanmoqda.