Mirzacho‘l iqtisodiy rayoni va Sirdaryo viloyati

Sirdaryo viloyati hududi asosan XX asrda o‘zlashtirilgan Mirzacho‘l yerlaridan iborat; dehqonchilikka yaroqli yer ko‘p, lekin tuproq sho‘rlanishi va yer osti suvi yuzaga yaqinligi sababli mehnat va mablag‘ ko‘p sarflanadi. Shu sababli zovurlar qaziladi, tuproq yuviladi, shamoldan saqlash uchun ihota daraxtzorlari o‘stiriladi. Viloyat mamlakatning eng kichik viloyatlaridan biri, aholisi sug‘oriladigan hududlarda yashaydi. Qishloq xo‘jaligining asosiy tarmoqlari paxtachilik, donchilik, polizchilik, sabzavotchilik va go‘sht-sut chorvachiligi; ekin maydonining katta qismiga paxta va g‘alla ekiladi. Sanoatning asosini elektr energetika tashkil etadi: Shirin shahridagi Sirdaryo issiqlik elektr stansiyasi quvvati rayondan tashqariga ham beriladi. Yana paxta tozalash, yog‘-ekstraksiya, un-yorma, qurilish materiallari va konstruksiyalari korxonalari bor. Viloyat markazi Guliston temiryo‘l va magistral yo‘l ustida joylashgan, unda universitet, litseylar va kollejlar ishlaydi. Yangiyer shahri 1957-yilda bunyod bo‘lgan, sopol va bosimga chidamli quvurlar, temir-beton buyumlari ishlab chiqaradi; Shirin esa energetikaga bog‘liq shahar. Viloyatda qo‘shma korxonalar ham faoliyat ko‘rsatadi.