Natural ko‘rsatkichli daraja

Bir xil ko‘paytuvchilar ko‘paytmasini qisqa yozish uchun daraja ishlatiladi: n ta a ning ko‘paytmasi aⁿ deb yoziladi. Bunda a — darajaning asosi, n — daraja ko‘rsatkichi, aⁿ ning qiymati esa shu ko‘paytmaning natijasi: 3⁴ = 3 · 3 · 3 · 3 = 81. a² «a ning kvadrati», a³ «a ning kubi» deb o‘qiladi; sonning birinchi darajasi o‘ziga teng: a¹ = a. Manfiy asosli darajada ishora ko‘rsatkichga bog‘liq: juft ko‘rsatkichda natija musbat, toq ko‘rsatkichda manfiy; (-2)⁴ = 16, (-2)³ = -8, lekin -2⁴ = -16, chunki daraja avval bajariladi. Darajaga ko‘tarish uchinchi bosqich amal. 10 dan katta sonni a · 10ⁿ (1 ≤ a < 10, n — natural son) ko‘rinishda yozish sonning standart shakli deyiladi.