Yaponiya va Koreya

Choson — «Tong tarovati» mamlakati — ilk koreys davlatidir; afsonaga ko‘ra uning asoschisi Tangun Pxenyanda qirollikka asos solgan (bu — afsona, koreyslar Tangun davrini xalqning tashkil topish davri deb hisoblaydi). Keyinchalik Qadimgi Choson o‘rnida uch qirollik — Pekche, Silla va Koguryo vujudga keldi. Koguryo IV–V asrlarda Koreya yarimorolining shimolida va Lyaodunda yirik davlat bo‘lib, xitoyliklarni haydadi; uning o‘rnida keyinroq Parxe qirolligi tashkil topdi va IX asrning birinchi yarmida kuchaydi, X asrda kidanlar zarbasidan so‘ng parchalandi. Janubda III–IV asrlarda Pekche vujudga keldi; Koreyaga buddizm va xitoy yozuvi Xitoydan kirib kelgan, Pekche esa ularni, budda tasvirlari va boshqa madaniyat unsurlari bilan birga, Yaponiyaga yetkazishda muhim rol o‘ynagan. Janubi-sharqdagi Silla dastlab eng zaifi bo‘lsa-da, 668-yilda Xitoydagi Tan sulolasi bilan ittifoq tuzib yarimorolni birlashtirdi; VIII asr o‘rtalarida uning oltin davri boshlandi. 918-yilda lashkarboshi Van Gon Koryo sulolasiga (918–1392) asos soldi, poytaxti Sonak (hozirgi Keson) bo‘ldi, «Koreya» nomi Koryodan kelib chiqqan. Mo‘g‘ullar 1231-yilda Koryoga bostirib kirib, uni uzoq vaqt o‘z ta’sirida tutdi. 1392-yilda sarkarda Li Son Ge so‘nggi Koryo hukmdorini taxtdan chetlatib Li sulolasiga asos soldi, mamlakat yana Choson deb ataldi, poytaxt Xansonga (hozirgi Seul) ko‘chirildi; XV asr o‘rtalarida Choson iqtisodiy va madaniy yuksaldi.