Mirzacho‘l tabiiy geografik okrugi

Mirzacho‘l okrugining katta qismi Sirdaryo va Arnasoy ko‘li orasidagi tekislikni egallaydi. Shimolda u Qozog‘iston, janubi-sharqda Tojikiston, shimoli-g‘arbda Qizilqum okrugi bilan chegaradosh. Okrugning janubida Turkiston, Morguzar va Nurota tog‘lari turadi; ularning shimoliy yonbag‘ri Mirzacho‘lga, janubiy yonbag‘ri O‘rta Zarafshon okrugiga kiradi, chegara suvayirg‘ich bo‘ylab o‘tadi. Yer yuzasi janubi-sharqdan shimoli-g‘arbga pasayadi. Tekislikning o‘rtacha balandligi 250–300 m, tog‘ etaklarida 450–530 m. Morguzar tog‘ining o‘rtacha balandligi 1500–2000 m, eng baland joyi 2621 m; Nurota tog‘ining eng baland cho‘qqisi Hayotboshi 2169 m. Morguzar bilan Nurota orasidagi Sangzor vodiysining eng tor joyi Amir Temur (Ilonotdi) darvozasi deyiladi, kengligi 120–130 m. Tekislikning markaziy qismida Sirdaryoning qadimiy o‘zanlari o‘rnida Yettisoy, Sardoba, Qorasuv kabi botiqlar bor. Foydali qazilmalar kam: marmar, asbest, ohaktosh, polimetall rudasi va tuzlar.