So‘z yasovchi va shakl yasovchi qo‘shimchalar

Asosga qo‘shilib, yangi ma’no hosil qiluvchi qo‘shimchalar so‘z yasovchi qo‘shimchalar deyiladi. Ular so‘z turkumini ham o‘zgartirishi mumkin. Masalan, -chi ot yasaydi (ish — ishchi), -li sifat yasaydi (foyda — foydali), -la fe’l yasaydi (taqsim — taqsimla), -iston joy nomini yasaydi (o‘zbek — O‘zbekiston), -zor joyda ko‘pligini bildiradi (bug‘doy — bug‘doyzor). Ba’zi so‘z yasovchilar asos oldidan qo‘shiladi: ser-, be-, no-, ba- (sermahsul, bexabar, notanish, bamaslahat). Yangi so‘zning ma’nosi asosdan anglashilgan ma’noga bog‘liq, lekin undan farq qiladi.