Ravish: yasalishi, yasovchi qo‘shimchalar va ma’no turlari

Harakat-holatning bajarilish tarzi, payti, o‘rni, daraja-miqdori kabi belgilarini bildiradigan so‘zlar ravish deyiladi. Ravish qanday? qachon? qayer(ga, da, dan)? qancha? so‘roqlariga javob beradi. «Tez yuguradi», «ertaga boradi», «ichkarida o‘tiradi», «ko‘p o‘qiydi» birikmalarida tez, ertaga, ichkarida, ko‘p — ravishlar. Ravish asosan fe’lga bog‘lanadi va uning belgisini bildiradi; ba’zan sifat yoki boshqa ravishga ham bog‘lanadi: juda chiroyli, ancha tez. Ravish o‘zgarmas so‘z turkumi: u egalik, kelishik, ko‘plik qo‘shimchalarini olmaydi.