Poyalar xilma-xilligi va kurtak

Kurtak — boshlang‘ich poya, ya’ni kelajak novda. Har qanday novda kurtakdan hosil bo‘ladi. Vegetativ kurtak boshlang‘ich bargli novda, generativ kurtak esa boshlang‘ich to‘pgul yoki gulni saqlaydi. Novda uchidagi kurtak uchki kurtak, barg qo‘ltig‘idagi yon kurtak deyiladi; ildiz va bargda qo‘shimcha kurtaklar ham bo‘ladi. Kurtaklar novdada ketma-ket, qarama-qarshi yoki halqa hosil qilib joylashadi. Yirik kurtakni (masalan, terak kurtagini) uzunasiga kessak, tashqarida zich kurtak tangachalari, ichkarida boshlang‘ich poya va juda mayda boshlang‘ich barglarni ko‘ramiz; tangachalar kurtakni qishki sovuq, mikrob va zamburug‘lardan saqlaydi. Kurtaklar qishki tinim davrini o‘tab, bahorda bo‘rtib o‘sadi. O‘rik, shaftoli, bodomda erta bahorda avval generativ kurtaklar ochilib gullaydi, so‘ng vegetativ kurtaklar yoziladi.