Ko‘p hujayrali yashil suvo‘tlar, qo‘ng‘ir va qizil suvo‘tlar

Chuchuk suvlarda yashaydigan ko‘p hujayrali yashil suvo‘tlarning ko‘pchiligi oddiy yoki shoxlangan iplar shaklida; ular o‘sish davomida hujayralari to‘xtovsiz bo‘linib, qattana doim kattalashib boradi. Ulotriks daryo va soylarda toshlar, yog‘ochlarga yopishib o‘sadi: tanasi shoxlanmagan ip, bir qator zanjirsimon hujayralardan iborat; tubidagi bitta hujayra rizoid bo‘lib, buyumga yopishtirib turadi; qolgan yashil hujayralarda belbog‘simon xromatofor bor. Jinssiz ko‘payishda hujayra 4 yoki 8 bo‘lakka bo‘linadi, ular to‘rtta xivchin bilan suzuvchi zoosporalar bo‘lib suvga chiqadi, so‘ng biror narsaga yopishib, ko‘ndalang bo‘linib yangi ip hosil qiladi. Jinsiy ko‘payishda ikki xivchinli, teng kattalikdagi jinsiy hujayralar (izogametalar) juft-juft qo‘shilib zigota hosil qiladi; zigota qalin po‘st bilan qoplanib tinim davrini o‘tadi, so‘ng to‘rt hujayraga bo‘linadi va ularning har biri yangi ipga aylanadi. Spirogira hovuz va sekin oqar suvlarda shoxlanmagan yirik silindrsimon hujayrali iplar bo‘lib, hech narsaga yopishmay suvda qalqib turadi. Kladofora — tallomi shoxlangan, bo‘yi 1 m gacha yetadigan suvo‘t; xara — ariq, hovuz va sholipoyada uchraydigan, 30–60 sm li sershox suvo‘t. O‘zbekiston suvo‘tlarini akademik A. M. Muzaffarov chuqur o‘rgangan. Suvo‘tlar suvni kislorodga boyitadi va baliqlar uchun oziq bo‘ladi.