Burchoqdoshlar oilasi

Burchoqdoshlar Yer sharining deyarli hamma joyida o‘sadigan 12 000 ga yaqin turni o‘z ichiga oladi (hozirgi hisoblarda bundan ancha ko‘p, 19 000 dan oshiq); asosan o‘tlar, qisman buta va daraxtlar. Ildizi o‘q ildiz bo‘lib, uning ustida tugunak bakteriyalar yashaydi: ular havodagi erkin azotni o‘simlik o‘zlashtira oladigan birikmalarga aylantiradi, buning evaziga o‘simlikdan oziq oladi, shuning uchun dukkakli ekinlardan keyin tuproq azotga boyiydi. Barglari ko‘pincha murakkab, yonbargchali, poyada ketma-ket joylashgan. Gullari qiyshiq, ikki jinsli; gultoji kapalak shaklida: ustida yirik «yelkancha» (bayroqcha), ikki yonida «eshkakchalar» (qanotchalar), pastda qo‘shilgan juft «qayiqcha». Changchilari 10 ta: 9 tasining iplari qo‘shilgan, 1 tasi erkin; urug‘chisi 1 ta; mevasi — dukkak. O‘tloq sebargasi (25–50 sm, uch yaproqli, kallaksimon to‘pgul), yantoq (ildizi chuqur, yer osti suviga yetadi), mosh, no‘xat, loviya, soya, yasmiq, yeryong‘oq (vatani Janubiy Amerika; changlangandan so‘ng gulli novda yerga egilib, mevasi tuproq ostida yetiladi) shu oilaga mansub. Oq akatsiya, tuxumak va gledichiya manzarali daraxtlardir. O‘zbekiston «Qizil kitob»ida eng ko‘p tur (60 ta atrofida) shu oiladan — astragal, oksitrops, tangao‘t turkumlari.