Vazifadosh ko‘makchilar, ma’no turlari, ma’nodoshlik

Bir xil ma’noni ba’zan ko‘makchi bilan ham, qo‘shimcha bilan ham ifodalash mumkin. Masalan, -dek qo‘shimchasi o‘xshatish ma’nosini beradi va bu jihatdan kabi, singari, yanglig‘ ko‘makchilariga ma’nodosh: muzdek sovuq — muz kabi sovuq. Jo‘nalish kelishigining -ga qo‘shimchasi esa yo‘nalish ma’nosida tomon ko‘makchisiga yaqin keladi: bekatga yurdik — bekat tomon yurdik. Ma’nodosh shakllar matnda bir xil so‘zning takrorlanishidan qutulishga va fikrni rang-barang ifodalashga yordam beradi. Biroq ular orasida ma’no tusi farqi bo‘lgani uchun har doim ham bir-birining o‘rnini bosavermaydi.