To‘g‘ri chiziqlarning parallelligi
Bir tekislikda yotib, kesishmaydigan to‘g‘ri chiziqlar parallel deyiladi; a ∥ b deb yoziladi. Parallel chiziqlarda yotgan kesma va nurlar ham o‘zaro parallel deyiladi. Teorema: bitta to‘g‘ri chiziqqa perpendikulyar bo‘lgan ikki to‘g‘ri chiziq parallel. Shu sababli berilgan chiziqqa tegishli bo‘lmagan O nuqtadan unga parallel chiziq o‘tkazish mumkin: O dan a ga perpendikulyar OA, so‘ng O dan OA ga perpendikulyar b o‘tkaziladi. Parallellik aksiomasi: tekislikda to‘g‘ri chiziqqa, unda yotmagan nuqtadan faqat bitta parallel to‘g‘ri chiziq o‘tkazish mumkin (u Evklidning beshinchi postulati bilan bog‘liq). Natija: ikki to‘g‘ri chiziq uchinchisiga parallel bo‘lsa, ular o‘zaro parallel; isbot teskarisini faraz qilish bilan: agar kesishsa, nuqtadan uchinchiga ikki parallel o‘tib qolardi.
«Parallel top»: sinfda stol qirralari, deraza ramkalari, doska chiziqlari orasidan parallel kesmalar juftini toping va daftarda belgilang.