Furqatning musaddasi va «Kashmirda» she’ri
Musaddas – olti misrali bandlardan iborat she’r. Furqat musaddasida lirik qahramon ovchiga murojaat qiladi: tuzoqqa tushgan ohuni qo‘yib yubor, u menday bechora, o‘z yorini topolmay ovora, baxti qora, hijron o‘qidan jarohatlangan, jigari kuygan. Har band oxirida ohuning tani ham menday hijron o‘qidan yaralangan, degan mazmundagi misra qaytariladi. Shoir ovchidan ohuni tog‘ga qo‘yib yuborishni, u yerda bir necha kun yori bilan o‘ynab-quvonib, senga duo qilishini iltimos qiladi; agar unga rahm qilmasang, hamrohiga rahm qil, deydi. Ohu – g‘urbatda ovora bo‘lgan shoirning o‘zi, sayyod esa taqdirning yoki zulm qiluvchi kuchlarning timsoli bo‘lishi mumkin. «Kashmirda» she’rida esa shoir Kashmirda oy yuzli go‘zalni ko‘radi va sehrlanadi; unga «zulfingga asirman» deganda, go‘zal «bu savdoni qo‘y, umring zanjirda o‘tadi» deb javob beradi. Shoir «lab ustidagi nuqta o‘rinsiz» desa, u kulib, «qudrat kotibi tahrirda xato qilgan» deydi; «nega Vatanni tark etding?» degan savolga shoir «g‘urbatda bo‘lish Furqatning taqdirida bor ekan» deb javob beradi.
Musaddasni uch qismga bo‘ling: murojaat, iltimos, o‘xshatish. Har bir qismga bitta sarlavha qo‘ying. Keyin butun she’rga o‘zingiz nom tanlang va sababini ayting.