Kuchlanish va tok kuchi

Tok kuchi o‘tkazgich kesimi orqali har sekundda qancha zaryad o‘tishini ko‘rsatadi, ya’ni o‘tgan zaryadning vaqtga nisbati: I = q/t, bundan q = I·t. Birligi amper (A): 1 A = 1 C/1 s, ya’ni kesimdan 1 s da 1 C zaryad o‘tsa, tok kuchi 1 A. Amalda milliamper (1 mA = 10⁻³ A) va mikroamper (1 µA = 10⁻⁶ A) ishlatiladi. Tok kuchi skalyar kattalik, «kuch» so‘zining mexanikadagi kuchga aloqasi yo‘q. Tok kuchini ampermetr o‘lchaydi; u iste’molchiga ketma-ket ulanadi, «+» qisqichi manbaning musbat qutbi tomonidan keladigan simga ulanadi. Ketma-ket zanjirning hamma joyida tok kuchi bir xil bo‘lgani uchun ampermetr iste’molchidan oldin yoki keyin ulansa ham bir xil qiymatni ko‘rsatadi. Hisoblashda minutni sekundga o‘tkazishni unutmang.