Qadimgi Misr madaniyati
Misr yozuvi insoniyatning eng qadimgi yozuvlaridan biri edi. Dastlab har bir so‘z rasm shaklida yozilgan. Yunonlar uni «iyeroglif» («muqaddas bitik») deb atagan, chunki u asosan maqbaralar va ibodatxonalar devorlariga, xudolar haykallariga o‘yib yozilgan. Yozuvni o‘rganish qiyin bo‘lgan, shu sababli savodli kotiblar (xattotlar) hurmatda bo‘lgan. Qamish qalam va mineral bo‘yoqlar bilan papirus — papirus poyasidan tayyorlangan «qog‘oz»ga yozishgan. 1799-yilda Rozett (Rashid) shahri yaqinida bir bitiktosh topildi, unda bir xil matn iyeroglif, demotik (xalq yozuvi) va yunon yozuvida bitilgan edi. Fransuz olimi Jan-Fransua Shampolyon yunoncha matnga tayanib, 1822-yilda iyeroglif yozuvini o‘qib chiqdi. Bitiktosh hozir Londondagi Britaniya muzeyida saqlanadi. Misrliklar yulduzlarni kuzatib astronomiyaga asos solgan; yilni 365 kun deb belgilab, 30 kunlik 12 oy va 5 qo‘shimcha kunga bo‘lgan. Yerni o‘lchash geometriyaga olib kelgan, ular kasrlar bilan ham hisoblagan. Asosiy o‘lchov birligi «podsho tirsagi» (≈52,5 sm) edi; vaqt suv soatlari bilan o‘lchangan.
«Ismingiz iyeroglifda»: bolalar ismining birinchi harfi uchun o‘zlari oddiy rasm-belgi chizadi va uni o‘rtoqlariga o‘qitadi.