Aleksandr yurishi, Salavkiylar va Yunon-Baqtriya

Mil. avv. 323-yilda Aleksandr Makedonskiy Bobilda vafot etdi, uning davlati lashkarboshilar o‘rtasida bo‘linib ketdi. Mil. avv. 312-yilda lashkarboshilardan biri Salavk Bobilda hokimiyatni egalladi va Salavkiylar davlatiga asos soldi; unga Mesopotamiya, Eron, Parfiya, Baqtriya, So‘g‘diyona va Marg‘iyona kirgan. Salavk O‘rta Osiyoni satrapliklarga bo‘ldi, o‘g‘li Antiox sharqiy viloyatlarni boshqardi. Tinch hayot tiklandi, Baqtra, Maroqanda, Marg‘iyona Antioxiysi (Marv) va Termiz kabi shaharlar yirik markazlarga aylandi. Yunon yozuvi, o‘lchovlari va tangalari tarqaldi, yunonlar esa mahalliy qurilish va hunarmandchilik an’analarini o‘zlashtirdi. Taxminan mil. avv. 250-yilda Baqtriya hokimi Diodot o‘zini podsho deb e’lon qilib, Yunon-Baqtriya podsholigiga asos soldi (Parfiya ham shu davrda ajralib chiqdi). Uning tarkibiga Baqtriya, So‘g‘diyona va Marg‘iyona kirgan. Demetriy davrida podsholik eng katta hududga ega bo‘ldi va Hindistonning bir qismini egalladi. Parfiya podshosi Mitridat I bosimi va ichki urushlar uni zaiflashtirdi; mil. avv. 140–130-yillar oralig‘ida ko‘chmanchi yuechji qabilalari Yunon-Baqtriyani bosib oldi.