Janubiy Amerikaning tabiiy geografik o‘lkalari
Janubiy Amerika relyefi bo‘yicha ikki yirik o‘lkaga bo‘linadi: Tog‘li G‘arb (And) va Tekislikli Sharq. Tog‘li G‘arbda Shimoliy, Markaziy va Janubiy And ajratiladi. Tekislikli Sharqda Lyanos–Orinoko, Amazoniya, Gviana va Braziliya yassi tog‘liklari, Patagoniya kabi kichik o‘lkalar bor. Amazoniya pasttekisligi Gviana va Braziliya yassi tog‘liklari orasida joylashgan, issiq va nam: harorat yil bo‘yi +24…+27 °C, yog‘in 1 500–3 000 mm. Daryo tarmog‘i juda zich, g‘arbda ko‘p yarusli doimiy yashil o‘rmon o‘sadi: seyba, geveya, kakao, Braziliya yong‘og‘i; unda anakonda, kayman va daraxt baqalari yashaydi. Braziliya yassi tog‘ligi qadimgi kristall jinslardan tuzilgan; unda temir, olmos, oltin, uran va marganes konlari bor. Uning daryolari yomg‘irdan to‘yinadi, yuzasi chuqur daryo vodiylari bilan parchalangan. Okeandan uzoqlashgan sari nam o‘rmonlar o‘rnini savannalar egallaydi; janubida araukariya o‘rmonlari va Paragvay choyi o‘sadi. «Braziliya» nomi qizil rangli daraxt — pau-brazil nomidan kelib chiqqan.
«Ikki o‘lka»: ikki ustunli jadval tuzing (Amazoniya va Braziliya yassi tog‘ligi): relyef, iqlim, o‘simlik, foydali qazilma qatorlari bilan.