BMT va dunyo bolalari
Ikkinchi jahon urushi bolalar boshiga katta ofatlar solgan edi. Shuning uchun BMT 1946-yilda Bolalarga yordam ko‘rsatish xalqaro jamg‘armasini — YUNISEFni tuzdi. Dastlab u urushdan ko‘p aziyat chekkan Yevropa bolalariga yordam berdi, keyin Osiyo, Afrika va Janubiy Amerika bolalariga ham yordam bera boshladi. 1965-yilda YUNISEF Nobel tinchlik mukofotini oldi. Bugun YUNISEF bolalarni xavfli kasalliklarga qarshi emlaydi, toza ichimlik suvi yetkazib beradi, ochlik va savodsizlikka qarshi kurashadi. Pul YUNISEFga davlatlar va xayrixoh odamlar beradi, shuningdek, tabrik otkritkalari sotiladi. Bu odat 1949-yilda boshlangan: chex qizcha Yitka Samkova yordam uchun rahmat tariqasida rasm chizgan, jamg‘arma xodimlari uning rasmini otkritkaga tushirgan. 1989-yilda BMT «Bola huquqlari to‘g‘risida»gi Konvensiyani qabul qildi. Unda 18 yoshgacha bo‘lgan har bir odam bola hisoblanishi, bolalarning yashash, sog‘lom o‘sish, o‘qish huquqi bor ekani yozilgan; bolalarni arzon ishchi kuchi qilib ishlatish va askarlikka jalb etish taqiqlangan. O‘zbekiston bu Konvensiyaga qo‘shilgan va YUNISEF bilan emlash, vaksina yetkazish, Orolbo‘yi aholisiga yordam kabi sohalarda hamkorlik qiladi. 2007-yilda «Bola huquqlarining kafolatlari to‘g‘risida»gi qonun qabul qilindi.
«Mening huquqlarim»: to‘rt huquqni (yashash, o‘qish, sog‘lom o‘sish, o‘ynash) rasm bilan ko‘rsating; har biriga bitta gap yozing.