O‘zbekiston poytaxti Toshkent — 2200 yoshda
Toshkent O‘zbekistonning poytaxti. Uning 2200 yilligi 2009-yilda nishonlandi. Arxeologlar qadimiy shahar o‘rni hozirgi temiryo‘l vokzali yaqinida, Salar kanali bo‘yida «Ming o‘rik» deb ataladigan joyda bo‘lganini aniqlagan. VI asrda shahar Choch viloyatining markaziga aylangan. Qadimgi Xitoy manbalarida shahar «Shi» (tosh) nomi bilan, arab manbalarida «Shosh», «Binkat» nomlari bilan tilga olingan; «Toshkent» so‘zi «tosh shahar» degan ma’noni anglatadi. Shahar mustahkam devor bilan o‘ralgan, ichida ark (hukmdor qarorgohi) va shahriston bo‘lgan, hunarmandlar esa rabotda yashagan. U karvon yo‘li yonida bo‘lgani uchun savdo va hunarmandchilik rivojlangan; shahardan turli mamlakatlarning tangalari topilgan. 1865-yilda Toshkent Rossiya tomonidan bosib olingan edi. 1991-yilda O‘zbekiston mustaqil bo‘lgach, Toshkent mustaqil davlatning poytaxtiga aylandi va bu Konstitutsiyada mustahkamlab qo‘yilgan. Shaharda Alisher Navoiy nomidagi milliy bog‘, Mustaqillik maydoni va Mustaqillik va ezgulik monumenti, Amir Temur xiyoboni va haykali, Oliy Majlis binolari, Xalqaro anjumanlar saroyi, Milliy kutubxona, Hazrati Imom majmuasi kabi ko‘plab inshootlar yangidan bunyod etilgan yoki qayta qurilgan. 2007-yilda Toshkent «Islom madaniyati poytaxti» deb e’lon qilindi.
«Toshkent nomlari»: Choch, Shosh, Binkat, Shi, Toshkent nomlarini zamon chizig‘iga qo‘ying va har birining ma’nosini yozing. Nima uchun shahar nomi o‘zgargan?