Gapdagi kiritmalar uslubiyati

Kiritma – gap ichiga qo‘yilib, aytilayotgan fikrni izohlaydigan yoki unga yangi ma’lumot qo‘shadigan birlik. Kirishdan farqi shundaki, kirish munosabat bildiradi, kiritma esa yangi axborot, izoh yoki eslatma beradi. Kiritma so‘z, so‘z birikmasi yoki gap shaklida bo‘lishi mumkin va ko‘pincha qavs bilan, ba’zan tire bilan ajratiladi. U nutqning aniqligi va to‘liqligini ta’minlagani uchun barcha uslubda uchraydi. Badiiy va publitsistik matnda kiritma orqali yozuvchi qahramonning o‘ziga xos gapirish odatini ko‘rsatadi yoki o‘z munosabatini qisqa luqma tarzida qo‘shib qo‘yadi. Kiritmani gapdan tushirsak, gap mazmuni o‘zgarmaydi, ammo qo‘shimcha ma’lumot yo‘qoladi.