Ritorik so‘roq gaplar uslubiyati

Ritorik so‘roq javob talab qilmaydi: u so‘roq shaklida aytilgan, ammo mazmuni ma’lum fikrni, ya’ni tasdiq yoki inkorni yashirin ifodalaydigan gapdir. Salbiy shakldagi ritorik so‘roq odatda tasdiqni bildiradi: «Kim bahorni sevmaydi?» – hamma sevadi. Ijobiy shakldagi ritorik so‘roq ko‘pincha inkorni anglatadi: «Uni kim ham tanirdi?» – hech kim tanimasdi. Ritorik so‘roqda fikr kuchli his-hayajon bilan, ta’kidli va ta’sirchan beriladi, shu sababli ta’sir kuchi jihatidan u yetakchi uslubiy vositalar qatoriga kiradi. U asosan so‘zlashuv, badiiy va publitsistik uslubda, shuningdek, notiqlik nutqida keng qo‘llanadi. Ritorik so‘roqni odatdagi darak gapga aylantirsak, mazmun saqlanadi, ammo uslubiy ta’sir susayadi.