O‘tkir Hoshimov hayoti

Darslikda O‘tkir Hoshimovning (1941–2013) «Mashaqqatli safar» nomli tarjimayi holi berilgan. Yozuvchi 1941-yil 5-avgustda Toshkent yaqinidagi Do‘mbirobod qishlog‘ida tug‘ilgan. Bobokaloni Abulqosimxon eshon Toshkentdagi madrasani bunyod etgan; otasi Atoulloxon haqparast, kitobsevar kishi, onasi Hakima esa yuvosh va mehribon ayol bo‘lgan; onasi «Dunyoning ishlari»dagi ona qiyofasiga o‘xshagan. Oilada bir qiz, to‘rt o‘g‘il edilar. Yozuvchi birinchi kitobi «Po‘lat chavandoz» ocherklar to‘plamini 3-kursda o‘qiyotganda chiqargan, birinchi hikoyasi «To‘rt maktub» 1963-yil 17-aprelda bosilgan. Abdulla Qahhorning yozgan xati unga ishonch bergan. 1966–1982-yillarda «Toshkent oqshomi» gazetasida bo‘lim mudiri bo‘lgan; shu davrda «Bahor qaytmaydi», «Qalbingga quloq sol», «Nur borki, soya bor» kabi asarlari yozilgan. Onasi 1980-yilda vafot etgach, farzandlik burchi haqidagi o‘y «Dunyoning ishlari» kitobiga sabab bo‘lgan. 1985–1995-yillarda «Sharq yulduzi» jurnalida bosh muharrir bo‘lgan. Qirq besh yilda 60 ga yaqin kitobi ikki milliondan ortiq nusxada chiqqan. Uning eng katta orzusi – kitobxon qahramonlar hayoti bilan yashaydigan asar yozish.