Baliqlarning ichki tuzilishi va nerv sistemasi

Baliqlarning markaziy nerv sistemasi bosh va orqa miyadan iborat; bosh miya beshta bo‘limli: oldingi, oraliq, o‘rta miya, miyacha va uzunchoq miya. Miyacha harakatni, uzunchoq miya nafas, qon aylanish va hazm organlari ishini boshqaradi. Baliq ko‘zi qovoqsiz, boshining ikki yonida joylashgan, yaqinni ko‘radi, shakl va rangni ajratadi. Burun teshiklari hid sezuvchi xaltachalarga ochiladi. Eshitish organi – ichki quloq, suv tovushni yaxshi o‘tkazadi. Ta’m hujayralari og‘izda va tana sirtida, zog‘oraning mo‘ylovlari tuyg‘u organi. Yon chiziq suv oqimi, bosimi va to‘siqni sezadi: ko‘r baliq ham to‘siqdan o‘tib ketadi. Ta’sirga javob – refleks: ta’sir sezgi tolalari orqali miyaga, u yerdan muskullarga boradi. Tug‘ma reflekslar – shartsiz reflekslar (instinktlar); ular nasldan naslga o‘tadi. Hayot davomida hosil bo‘ladigan reflekslar – shartli reflekslar: masalan, chiroq yoqib ovqat berilsa, baliq signalga yig‘iladi; ular nasldan o‘tmaydi va signal oziq bilan mustahkamlanmasa, asta-sekin yo‘qoladi.