O‘rta va Sharqiy Yevropa

Sharqiy Yevropa tekisligi Yevrosiyodagi eng yirik tabiiy o‘lkalardan biri bo‘lib, maydoni taxminan 4 mln km². U Yevropaning sharqida joylashgan va shimolda tundradan janubi-sharqda cho‘lgacha cho‘zilgan. Geologik jihatdan tekislik qadimgi, barqaror Sharqiy Yevropa platformasida joylashgan, uning ustini dengiz va kontinental yotqiziqlari qoplagan. Foydali qazilmalari boy: Krivoy Rog va Kursk magnit anomaliyasida temir rudasi, Donetsk va Pechora havzalarida toshko‘mir, Volga–Ural va Pechora rayonlarida neft, Boltiqbo‘yida yonuvchi slanes. Relyefida balandliklar (Valday, O‘rta Rus), qirlar va pasttekisliklar uchraydi. Iqlimi Atlantikadan keladigan iliq nam va Arktikadan keladigan sovuq havo ta’sirida; g‘arbdan sharqqa va shimoldan janubga kontinentallik ortadi. G‘arbda qish yumshoq (–6…–8 °C), sharqda sovuq (–10…–20 °C); yoz ko‘p joyda salqin (+18…+22 °C), janubi-sharqda issiq (+25…+29 °C); yog‘in g‘arbdan sharqqa 800 dan 600 mm gacha kamayadi, Kaspiybo‘yida eng kami (taxminan 200 mm). Daryolari serob: Pechora, Mezen, Shimoliy Dvina shimolga, Volga, Dnepr, Ural janubga oqadi. Shimoliy-g‘arbda ko‘llar ko‘p. Tabiat zonalari shimoldan janubga almashadi: tundra, o‘rmon-tundra, tayga, aralash o‘rmonlar, keng bargli o‘rmonlar, o‘rmon-dasht, dasht, chalacho‘l va cho‘l.