Nafas olish tizimi
Hujayralar ovqatdan energiya olishi uchun kislorod kerak. Kislorod zaxirasi tanada kam, shuning uchun biz doim nafas olamiz. Miya nafas olishni o‘zi boshqaradi, uyquda ham biz nafas olaveramiz. Havo burun orqali kiradi: burunda u changdan tozalanadi, namlanadi va isiydi. Shuning uchun burundan nafas olgan yaxshi. Keyin havo traxeya (nafas nayi), undan ikkita bronx orqali o‘pkaga boradi. O‘pka g‘ovak, qon tomirlariga boy a’zo. Bu yerda qon karbonat angidridni topshirib, kislorodni oladi. Nafas olishga diafragma — o‘pka tagidagi mushak yordam beradi: u pasaysa, o‘pka kengayib, havo bilan to‘ladi, ko‘tarilsa havo chiqadi. Qondagi qizil hujayralar — eritrotsitlar kislorodni butun tanaga tashiydi. Havoni toza saqlash uchun xonani shamollatish, chekilgan yoki changli joydan uzoq turish, sport bilan shug‘ullanish foydali.
Nafas sanash: bir daqiqada necha marta nafas olishingizni sanang (o‘tirib, tinch holatda), keyin 20 marta o‘tirib-turib, yana sanang. Natijani solishtiring. Nafasni uzoq ushlab turish tajribasini o‘tkazmang: boshingiz aylanishi mumkin.