Taklif va taklif qonuni

Taklif – sotuvchilar tovarni turli narxlarda qancha sotishga tayyor va qodir ekanini ko‘rsatadigan bog‘lanish. Taklif miqdori esa aniq bir narxdagi shunday miqdor. Taklif qonuni: boshqa sharoitlar o‘zgarmaganda narx qancha yuqori bo‘lsa, taklif miqdori shuncha katta, narx past bo‘lsa, shuncha kichik bo‘ladi. Sababi shuki, yuqori narx foydani oshiradi va ishlab chiqaruvchi ko‘proq ishlab chiqarishga rag‘batlanadi; bundan tashqari, yangi sotuvchilar bozorga kiradi. Jadvaldagi nuqtalar tutashtirilsa, o‘ngga ko‘tarilib boruvchi S chizig‘i hosil bo‘ladi (inglizcha supply). XVIII asrda Adam Smit bozorda har kim o‘z manfaatini ko‘zlab ishlasa ham, talab va taklif ularni boshqarib, jamiyatga ham foyda keltirishini «ko‘rinmas qo‘l» deb atagan. Ya’ni markaziy buyruqsiz ham bozor kerakli tovarni bozorga olib keladi.