Texnologik jarayon bosqichlari va ishlab chiqarishni tayyorlash
Deyarli har qanday mahsulot uch bosqichdan o‘tadi: avval tayyorlanma (zagotovka) olinadi, keyin undan tayyor detallar yasaladi, oxirida detallar buyumga yig‘iladi. Masalan, mashinasozlik zavodining quyish yoki shtamplash sexida metalldan bo‘lajak detalga yaqin shakldagi tayyorlanma olinadi; u o‘lchamga qanchalik yaqin bo‘lsa, keyin kesib tashlanadigan metall shuncha kam bo‘ladi. Mexanika sexida tokar, frezerchi, slesar va pardozlovchi tayyorlanmaga stanoklarda aniq shakl beradi; kerak bo‘lsa, detal termik yoki kimyoviy ishlov bilan pishiqlanadi va zangdan saqlovchi qoplama bilan qoplanadi. Yig‘ish sexida avval alohida uzellar (masalan, dvigatel) yig‘iladi, so‘ng konveyerda ulardan butun mashina hosil bo‘ladi. Yangi mahsulot ommaviy ishlab chiqarilishidan oldin korxona uni uch tomonlama tayyorlaydi: konstruktorlar ishchi chizmalarni chizadi, texnologlar jarayonni loyihalab marshrut va operatsiya kartalarini tuzadi, tashkilotchilar esa sexlar, ta’minot va tajriba namunasini hal qiladi. Jarayon loyihalanayotganda texnolog nafaqat buyumga qo‘yilgan talablarni, balki korxonada qanday stanok, asbob va malakali ishchilar borligini ham hisobga oladi.
Jarayon sxemasi: tanlangan buyum (stul, kurak) uchun uch bosqichni ustun ko‘rinishida chizing va har bosqichga bitta kasb nomini yozing (masalan, tokar, slesar, yig‘uvchi).