XVI–XVIII asrlarda Hindiston

XVI asr boshida Shimoliy Hindiston tarqoq edi; Dehli sultonligida Ibrohim Lo‘di hukmronlik qilardi. Kobul hukmdori Zahiriddin Muhammad Bobur 1526-yil 21-aprelda Panipat jangida uni yengdi va Boburiylar sulolasiga asos soldi (1530-yilda vafot etdi). O‘g‘li Humoyun 1540-yilda Sherxondan mag‘lub bo‘lib Eronga ketdi, 1555-yilda Dehlini qaytarib oldi. Akbar (1556–1605) davlatni viloyatlarga bo‘lib, soliq tizimini tartibga soldi, musulmon bo‘lmaganlardan jizyani bekor qildi va hindlarni boshqaruvga jalb qilib, diniy bag‘rikenglik siyosatini yuritdi. Shoh Jahon davrida (1628–1658) Agrada Tojmahal mavzoleyi qurildi. Avrangzeb (1658–1707) jizyani qayta tikladi va soliqlarni oshirdi; bu xalq qo‘zg‘olonlariga olib keldi. XVIII asrda imperiya parchalandi, 1739-yilda Nodirshoh Dehlini egalladi. Buyuk Britaniyaning Ost-Indiya kompaniyasi bundan foydalandi: 1757-yilda Bengaliyada g‘alaba qozonib, Hindistonni asta-sekin mustamlakaga aylantirdi. Boburiylar davrida «Mahabharata» va «Ramayana» fors tiliga tarjima qilindi, Tulsidas va Surdas ijod qildi, Mirzo Bedil she’rlar yozdi.