Ma’lumotlarni tartiblash

Excelda ro‘yxat ma’lumotlar bazasi kabi qaraladi: ustun – maydon, ustun sarlavhasi – maydon nomi, har bir satr – yozuv. Tartiblash yozuvlarni tanlangan maydon qiymatiga ko‘ra o‘sish (kichikdan kattaga, A dan Z ga) yoki kamayish (kattadan kichikka) tartibida joylashtiradi; yozuvlar soni o‘zgarmaydi. Jadvalni to‘liq belgilab yoki uning bitta katakchasini tanlab, Ma’lumotlar (Data) → Tartiblash (Sort) buyrug‘i beriladi, «ma’lumotlarim sarlavhaga ega» belgisi esa birinchi satrni tartiblashdan chiqaradi. Agar faqat bitta ustunni belgilab tartiblasangiz, ustun siljiydi, qolganlari joyida qoladi va ismlar boshqa odamning ma’lumotiga tushib qoladi. Bir nechta maydon bo‘yicha tartiblashda birinchi maydon qiymatlari teng yozuvlar ikkinchi maydon, keyin uchinchi maydon bo‘yicha tartiblanadi. Harflar tartibi tilga bog‘liq: o‘, g‘, sh, ch harflari til sozlamasiga ko‘ra kutilganidan boshqacha joylashishi mumkin, natijani tekshiring; asl tartibni qaytarish uchun oldindan raqamlar ustunini qo‘shib qo‘ying.