Qo‘l asboblari: o‘lchash, arralash, randalash

Arralab olingan materialning sirti randalash orqali tozalanadi, tekislanadi va aniq o‘lchamga keltiriladi. Randa kunda, tig‘ va ponadan iborat. Sherxebel xomaki randalash uchun: kundasi 250–260 mm uzun, tig‘ining eni 30 mm, kesuvchi qirrasi yoy shaklida va kundadan 1–3 mm chiqib turadi, shu sababli qalin payraha oladi. Taxta randa silliq randalash uchun: kundasi eni 55–60 mm, tig‘i eni 45–50 mm, tig‘ kundadan 0,1–0,3 mm chiqarib o‘rnatiladi. Mushranda taxta randaga o‘xshash, lekin tig‘ida payrahani sindiradigan temir pushtak bor. Japs randa uzun taxtalarni tekislash uchun: kundasi 700–800 mm uzun, tig‘i taxta randadagidek juda oz (taxminan 0,1–0,3 mm) chiqariladi. Randalashda zagotovka iskanjada mahkamlanadi, randa chap qo‘l bilan oldidan, o‘ng qo‘l bilan orqasidan ushlanib oldinga yuritiladi. Sirt tekisligi chizg‘ich yoki go‘niya bilan tekshiriladi.