Mustahkamlash, matn bilan ishlash va urg‘u

Urg‘u ikki xil bo‘ladi: so‘z urg‘usi va gap urg‘usi. So‘z aytilganda bo‘g‘inlardan biri boshqalaridan kuchliroq, biroz cho‘ziqroq aytiladi — bu so‘z urg‘usidir. O‘zbekcha so‘zlarda urg‘u odatda oxirgi bo‘g‘inda bo‘ladi va qo‘shimcha qo‘shilganda oxirgi bo‘g‘inga ko‘chib boradi: daftár — daftarlár — daftarlardá. Boshqa tillardan kirgan so‘zlarda urg‘u ko‘pincha oxirida bo‘lmaydi: avtóbus, gazéta, mótor. Urg‘u ma’noni ham farqlashi mumkin: olmá (ot, meva) — ólma (fe’l, «olmagin»). Lug‘at va darsliklarda urg‘u bo‘g‘in ustiga belgi bilan ko‘rsatiladi, oddiy yozuvda esa bu belgi qo‘yilmaydi.