Energiya va uning o‘zgarishlari

Energiya — ish bajarish, harakat qildirish yoki o‘zgarish hosil qilish qobiliyati. Bola yugurish uchun, mashina yurish uchun, chiroq yonishi uchun energiya kerak. Tabiatda energiya manbalari: Quyosh, shamol, oqar suv, ko‘mir, neft, gaz, atom yoqilg‘isi. Odam va hayvonlar energiyani oziqdan oladi, o‘simliklar esa Quyosh nuridan. Eng ko‘p energiyani Quyosh beradi. Energiya turlari: mexanik energiya (harakatdagi yoki ko‘tarilgan jismning energiyasi: yuguruvchi, shamol, kran), issiqlik energiyasi (issiq suv, bug‘, olov), yorug‘lik energiyasi (Quyosh nuri, chiroq nuri), elektr energiyasi (elektr toki). Qadimda odamlar yukni o‘zlari yoki otlar bilan tashigan, hozir yoqilg‘i va elektrdan foydalanadi.