Yerning suv resurslari
Yerdagi suv okeanlar, dengizlar, daryolar, ko‘llar, muzliklar va yer ostida to‘plangan. Bir qismi atmosferada bug‘ va bulut ko‘rinishida, tirik organizmlar tanasida ham suv bor. Tabiiy suv havzalari: okean, dengiz, daryo, ko‘l, botqoqlik. Sun’iy suv havzalari: hovuz, suv ombori, kanal. Daryo ko‘pincha tog‘lardan boshlanib, dengiz, ko‘l yoki boshqa daryoga quyiladi. Yer yuzidagi suvning katta qismi sho‘r (okean va dengiz); uni ichib bo‘lmaydi, chunki tuz ko‘p. Chuchuk suv esa ancha kam, shuning uchun uni tejash kerak: tish yuvayotganda jo‘mrakni yopish, vannadan ko‘ra dushda yuvinish, tomayotgan jo‘mrakni ta’mirlash. Ichimlik suvini qaynatib ichish kerak, chunki xom suvda zararli bakteriyalar bo‘lishi mumkin.
«Suv sarfi» so‘rovnomasi: oila a’zolaringiz kuniga qayerda suv ishlatishini (yuvinish, idish yuvish, kir yuvish, sug‘orish) yozing. Qayerda suvni tejash mumkin? Suvni asrash plakatini chizing.