Jinoyat protsessi ishtirokchilari

Jinoyat protsessida ishtirok etuvchilar bir necha guruhga bo‘linadi. Ish yuritishni olib boruvchi organlar va shaxslar: surishtiruvchi, tergovchi, prokuror, sudya va sud majlisi kotibi. O‘z manfaatini himoya qiluvchilar: gumon qilinuvchi, ayblanuvchi, sudlanuvchi, ularning himoyachisi, jabrlanuvchi, fuqaroviy da’vogar, fuqaroviy javobgar va ularning qonuniy vakillari. Boshqa ishtirokchilar: guvoh, ekspert, mutaxassis, tarjimon va xolislar. Prokuror davlat nomidan ayblovni qo‘llab-quvvatlaydi, himoyachi esa ayblanuvchining huquqini himoya qiladi, shu tariqa tomonlarning tortishuvi ta’minlanadi. Voyaga yetmagan shaxs ishi bo‘yicha himoyachi ishtiroki majburiy hisoblanadi. Agar sudya yoki tergovchi ishning natijasidan manfaatdor bo‘lsa, ish ishtirokchisi bilan qarindosh bo‘lsa yoki xolisligiga shubha tug‘diradigan holat mavjud bo‘lsa, u ishda qatnasha olmaydi va rad etilishi kerak. Bir instansiyada ishni ko‘rgan sudya, odatda, o‘sha ishni boshqa instansiyada ko‘rishda ishtirok eta olmaydi.