Zulfiya: hayoti va ijodi

Zulfiya Isroilova 1915-yilda Toshkentning qadimiy Dergez mahallasida tug‘ilgan. Boshlang‘ich maktab va xotin-qizlar bilim yurtida o‘qigan, 1935–1938-yillarda Fanlar akademiyasining Til va adabiyot instituti aspiranturasida tahsil olgan. 1953–1980-yillarda «Saodat» jurnalining bosh muharriri bo‘lgan. Dastlabki she’rlari 1932-yilda «Hayot varaqlari» nomi bilan bosilgan; keyin «Qizlar qo‘shig‘i» (1938), «Hijron kunlarida» (1944), «Dalada bir kun» (1948), «Yuragimga yaqin kishilar» (1958), «Shalola» (1974) kabi o‘nlab to‘plamlari chiqqan. Turmush o‘rtog‘i shoir Hamid Olimjon 1944-yilda 34 yoshida avtomobil halokatida vafot etgan. Zulfiya umr bo‘yi unga sodiq qolib, uning ishlarini davom ettirgan, dostonlari asosida pyesa va libretto yozgan, «Quyoshli qalam», «Mushoira», «Xotira siniqlari» poemalarini yaratgan va rus, ukrain, ozarbayjon, hind shoiralari she’rlarini tarjima qilgan. U O‘zbekiston xalq shoirasi, xalqaro «Nilufar», Javoharlal Neru va Davlat mukofotlari sohibasi. 1996-yilda 81 yoshida vafot etgan. Uning nomidagi Davlat mukofoti iste’dodli qizlarga beriladi.