Bular nimadan yasalgan?
Atrofimizdagi ko‘p narsani inson yasagan: maktab jihozlari, kiyim, o‘yinchoq, idish, mebel, transport. Ular har xil materiallardan tayyorlanadi. Yog‘och — qattiq, oson yonadi. Loydan g‘isht va idishlar yasaladi: u ho‘l paytida yumshoq, kuydirilgach qattiq bo‘ladi. Metall mustahkam va sovuq. Jun yumshoq, issiqni saqlaydi. Shisha ham keng ishlatiladi, plastmassa esa eng yangi materiallardan biri. Bir xil buyumni har xil materialdan yasash mumkin: qoshiq yog‘ochdan ham, metalldan ham, plastikdan ham bo‘ladi.
Tajriba «Qaysi material suvni o‘tkazadi?»: qog‘oz, mato, plastik paket, yog‘och bo‘lagi va folga ustiga bir tomchidan suv tomizing. Qaysi birida suv shimildi, qaysi birida tomchi bo‘lib turdi? Natijani jadvalga yozing. Keyin sinfdan 5 ta narsani topib, nimadan yasalganini aytamiz. Xavfsizlik: o‘tkir va sinadigan narsalarga tegmang.