O‘simliklar dunyosi
O‘simliklar bo‘lmasa, tirik jonzotlar yashay olmaydi. Ular ildizi bilan tuproqdan suv va minerallarni so‘rib oladi, yashil barglarida quyosh nuri yordamida qand moddasini hosil qiladi va havoga kislorod chiqaradi, biz esa shu bilan nafas olamiz. Inson o‘zi ekib o‘stiradigan o‘simliklar madaniy deyiladi, o‘z-o‘zidan o‘sadiganlari — yovvoyi. Madaniy o‘simliklar sabzavot, meva, g‘alla va manzarali bo‘ladi. O‘simliklarni o‘rganadigan fan — botanika, nabotot olami esa flora deyiladi.
Tajriba «O‘simlik suvni qanday ichadi?»: stakanga suv quyib, 10–15 tomchi oziq-ovqat bo‘yog‘i (yoki siyoh) qo‘shing. Oq gul (yoki seldereyning poyasi) solib qo‘ying. Bir kundan keyin gul bargi (poya) bo‘yalganini ko‘rasiz: suv poya orqali ko‘tarilgan. Xavfsizlik: bo‘yoqni og‘izga olmang, ish tugagach qo‘lingizni yuving.