Jadvallar ustida amallar

Tayyor jadvalni ko‘pincha o‘zgartirish kerak bo‘ladi. Yangi satr yoki ustun qo‘shish uchun yurgich qo‘shiladigan joyga yaqin katakka qo‘yiladi va Maket (Layout) tabining Satrlar va ustunlar guruhidan «Yuqoridan», «Pastdan», «Chapdan» yoki «O‘ngdan joylashtirish» tanlanadi. Ortiqcha satr yoki ustunni o‘chirish uchun yurgich shu satr yoki ustunga qo‘yiladi (bir nechta bo‘lsa, blokka olinadi) va O‘chirish (Delete) ro‘yxatidan Satrlarni yoki Ustunlarni o‘chirish tanlanadi; oddiy Delete klavishi esa faqat katak ichidagi yozuvni o‘chiradi. Kataklarni birlashtirish uchun to‘g‘ri to‘rtburchak shaklidagi kataklar blokka olinib, «Kataklarni birlashtirish» (Merge Cells) bosiladi; jadval sarlavhasini bir necha ustun ustiga yozishda bu qulay. Aksincha, bitta katakni bo‘lish uchun yurgich shu katakka qo‘yilib, «Kataklarni bo‘lish» (Split Cells) bosiladi va oynaga hosil bo‘ladigan ustun va satrlar soni kiritiladi. Matn katakda gorizontal yoki vertikal (yuqoridan pastga yoki pastdan yuqoriga) yozilishi mumkin; buning uchun «Matn yo‘nalishi» tugmasi bir necha marta bosiladi yoki o‘ng tugma menyusidan tanlanadi. Satr yoki ustunni sichqoncha bilan belgilash uchun chap chetidagi yoki ustidagi strelka ko‘rinishidagi joyga bosiladi.